Ter Wille Van Ons Kinders

BCVO se Geloofsgrondslag

CVO is gegrondves in die Calvinistiese Protestantse geloof.
Die soewereiniteit van ‘n God Drie-enig, die Koningskap van Jesus Christus en die lig van God ’s Woord word erken op alle terreine van die skepping en vir die hele lewe van die mens.
Dat God ‘n genadeverbond met sy kinders het waar Hy bepaal dat Hy vir ons ‘n God sal wees en eis dat ons Hom gehoorsaam.
Dat ons in ons kerke, skole, gesinne, volk en staat elkeen ‘n God bepaalde eie selfstandigheid en struktuur het en elkeen sy eie God opgelegde sin, verantwoordelikheid, bestemming en roeping het.

Visie

Ons onderrig elke leerder op ‘n Christelike Volkseie wyse en so berei ons elkeen voor om hul gemeenskap op ‘n betekenisvolle wyse te beïnvloed. Elke leerder is belangrik en elke leerder se welstand en vordering is ons hoof prioriteit.

Missie

In samewerking met BCVO, voorsien ons elke leerder van die volgende:

  • Voorbereiding op ‘n hoë akademiese vlak om onafhanklik te kan funksioneer in enige volwasse omgewing.
  • Voorbereiding om ‘n gebalanseerde lewe te hê met Christelike waardes en ‘n trots vir Afrikaans en ons geskiedenis.
  • Produktiwiteit op vele terreine. Met die CAPS kurrikulum gekombineer met Bybelonderrig en Volkseie geskiedenis kan elke leerder verseker wees van ‘n heilsame toekoms.

Die besonderse Volksgrondslag van die BCVO:

Volksgebonde en Kultuurgebonde onderwys eie aan die Afrikaner.
God het in Sy Raadsplan beskik dat die Afrikaner Boerevolk in sy geskiedenis, kultuur en tradisies uit ‘n Calvinistiese/Protestantse lewens- en wêreldbeskouing ontstaan en gegroei het.
CVO Lydenburg dra hierdie betrokke lewens- en wêreldbeskouing oor in die opvoeding sodat daar by ons kinders ‘n liefde gekweek word vir hierdie besonderse Christelike Volkseie geskiedenis.
Geen kind weet waarheen hy op pad is as hy nie weet waarvandaan hy kom nie.

Ons geskiedenis

Lydenburg Akademie vir CVO is amptelik gestig in 1994. Ons eerste leerders het 10 Januarie 1995 deel gevorm van ons trotse stigting. Leerders het in die Afrikaanse Protestantse Kerk se saal skoolgegaan tot die skoolgeboue opgerig is in April 1995.

Die skool is opgerig op meneer Martiens Krügel se plaas in Rooidraai net buite Lydenburg. Ouer-betrokkenheid het hier na vore gekom soos daar inspanning uitgeoefen is om die ou skuur op die plaas gereed te kry om as ‘n skool te kon dien. Sportgronde is opgerig en die skool was reg om nog vele leerders deur die geskiedenis van die skool op te voed en te onderrig.

Bykans 4 jaar later het die skool ‘n grootmoedige skenking ontvang van meneer Martin Mulder – ‘n boer van Sterkspruit in Lydenburg – en so kon Lydenburg Akademie ons eie skoolgronde stig. Die skool staan trots tot vandag, danksy vele insette van ons barmhartige ouers.

Hoe funksioneer ons by Lydenburg Akademie?

Op ‘n akademiese vlak, fokus ons op ‘n hoë standaard in alle opsigte. Akademiese prestasies gebaseer op die CAPS kurrikulum en geïnspireer deur Christelike waardes en volkseie geskiedenis is ons hoof prioriteit.
Daar word ook ontwikkeling gebied vir sport van verskillende soorte wat die volgende insluit: Atletiek, Netbal, Rugby, Landloop, Hokkie en Skaak.
Ons vestig ook ons aandag op kulturele ontwikkeling soos kunswedstryde, literatuur geleenthede, redenaars en konserte.
Ons fokus is gevestig op ‘n gebalanseerde ontwikkelings fase vir elke leerder.
Back To Top